Te parau nō te fa’a’apu, e ’ohipa fa’ahiahia ’e te faufa’a rahi mau nō te feiā rautea, te nūna’a ta’ata ’e te tā’ato’ara’a e rohi nei nō te ha’amāhiera’a i te fa’arava’ira’a faufa’a ’e te orara’a tōtiare i Pōrīnetia. Mea tano ia pāturuhia te fā ia roa’a i te fa’a’amu i tōna nuna’a ta’ata ’e te pāhono i tōna mau hina’aro ato’a.

Te mau tāpa’o fa’a’ite e ua manuia te pōrītita fa’a’apu, tei roto īa i te ha’amaita’ira’a i te reira tuha’a mai te ’ōmuara’a mai, oia ho’i te fāna’ora’a i te tahi tapū fenua, te ha’api’ira’a, te fa’anahora’a i te mau ’ama’a ’ohipa fa’a’apu ē tae atu i te ha’amaura’a i te mau rāve’a tapiho’o i te mau mā’a hotu o te fenua. 

Noa atu te pa’ari o te tōro’a e te morohira’a o te ’ana’anatae, ia au i te tai’o o te rahira’a o te feiā fa’a’apu ’e te itira’a o te ’ā’ano o te fenua fa’a’apu, tē vaivai noa ra te anira’a i te tahi fenua fa’a’apu, aita rā e roa’a ra i te Hau fenua i te pāhono i te hina’aro.

Nō reira teie ’ōpuara’a moni tauturu a te Hau fenua, e fa’arava’ira’a ana’e teie i te mau tauturu e vai ra nō te ha’afaufa’a i te mau fenua fa’a’apu unuma.

I ni’a i te tumu o te ’ōpuara’a, tē māramarama ra te ’Āpo’ora’a Mātutu Ti’a Rau ’e Mata U’i i te fa’ahiehie o teie mauha’a ’āpī, ’e teie tōna mau mana’o ’āvei :

• Ia tāpa’ohia te mau fa’anahora’a o teie moni tauturu ’āpī i roto i te ture fenua n°2017-26 o te 9 nō ’ātopa 2017 tauihia i ni’a i te mau tauturu o te ’ōhipa fa’a’apu ;
• Ia tītī’a-maita’i-hia te feiā rautea, e ta’ata fa’a’apu, e fatu fenua tauturuhia ;
• Ia vaimatara te mau ara fa’a’āpīhia, e aore ra tei patu-’āpī-hia, i te huira’atira, e fa’ature rā i ni’a i te vai-paruru-ra’a o te ta’ata ;
• Ia fa’ata’ahia te tahi areā tau iti nō te fa’a’apu, hou a ha’amanahia ai ’ei fenua fa’a’apu ;
• Ia fa’aturehia ’e ia hi’opo’ahia te ’ā’anora’a o te fenua nō te fa’ati’a i te mau fare nohora’a ;
• Ia pāpa’i-māramarama-hia i roto i te ture fenua te mau tītaura’a nō te fāna’o i te tauturu ;
• Ia fa’aineine te mau pū ’ohipa a te Hau fenua i te pu’era’a parau tuatāpapa i te terera’a ’ohipa ’e te terera’a faufa’a e ha’apāpū ra e ua fa’aturahia te mau tītaura’a i ni’a i te ha’afāna’ora’a i te tauturu, ’e ua rave-hope-hia mai tei fa’aotihia ; 
• Ia fa’anahohia te fa’aarara’a ’e te ha’amāramaramara’a i ni’a i teie ’ōpuara’a ture ;
• Ia ’ohipa ’āmui te mau piha ’ohipa a te mau fa’atere hau fenua nō te fa’atū’ati i te mau ture fenua i ni’a i te tī’a’aura’a i te faufa’a fenua ’āmui, te fa’atorora’a i te purūmu, e teie ’ōpuara’a ture fenua.

Ei fa’ahopera’a, ’e i ’ō mai i teie ’ōpuara’a ture fenua, tē turu nei te ’Āpo’ora’a Mātutu Ti’a Rau ē Mata U’i i te Hau fenua ia tūtava i te ’imi i te rave’a nō te tātara i te fifi o te faufa’a fenua ’āmui i roto i te parau o te poritita fa’anahora’a i te fenua, ’e hau atu ā te tātarara’a i te ’e’a nō te mau ’ōpura’a nō ’ānanahi.

’O te mana’o īa o te ’Āpo’ora’a Mātutu Ti’a Rau ē Mata U’i i ni’a i te fa’atorora’a i te purumu tomora’a ’e te fa’anahora’a i te mau fenua unuma fa’ata’ahia nō te fa’a’apu.