Tē tītau nei te Hau fenua e ha’amara’a te nūmera o te mau manihini rātere i Pōrīnetia farāni ia rae’a te faito e 600.000 i te matahiti nō na matahiti 10 e haere mai nei.

Ia au i te mau tai’o e vai nei, e moemoeā tō teie fā, ’e mea tano īa ia fa’aohipa i te tahi poritita pāpū ’e te mau fa’atītī’aifarora’a i te pae o te ture ’e te fa’atupura’a faufa’a.

Ua hina’aro te mau ’ōpuara’a ture fenua i hi’opo’ahia na e te ’Āpo’ora’a Mātutu Ti’a Rau e turu i te ha’amahiera’a o te mau hōtera ’utuāfare, niu o te fa’ari’ira’a manihini o te fenua nei, nō tōna ta’a’ē e tāna huru ha’afātatara’a i te nuna’a mā’ohi.

Nō teie ’ōpuara’a ture fenua i ni’a i te tauira’a i te ture fenua n°2023-30 nō te 29 nō ’ātete 2023 e ha’apāpū ra i te fa’aterera’a e te tuhara’a mana fa’atere i te poritita fa’ari’ira’a manihini i Pōrīnetia farāni, teie te mau mana’o ’āvei o te ’Āpo’ora’a Mātutu Ti’a Rau ē Mata U’i :

• E ha’amara’a te tino moni i fa’ata’ahia nō te fa’ati’ara’a i te mau tōmite fa’ari’ira’a manihini ;

• E tuatāpapa tāmau i te terera’a o te mau tōmite, mai te ha’amaura’a o te mau mero, te manuira’a o tā rātou ’ōhipa, ’e te roa’ara’a i te fa’atano te ti’ara’a mana ’āpiti i ni’a i te mau tuha’a ’ohipa tītauhia e te mau rāve’a i tu’uhia i roto ia rātou.

I ’ō mai i teie mau nu’ura’a o tā te ’Āpo’ora’a Mātutu Ti’a Rau ē Mata U’i e mana’o ra e mea faufa’a nō te ha’apa’arira’a i roto i te tōro’a ’e te ha’amaita’ira’a i te huru o te fa’ari’ira’a i te mau rātere, tē ’ite nei o ia i te tahi ta’a’ēra’a rahi i ni’a i te poritita tutera’a i fa’ata’ahia e te Hau fenua i roto i tāna tāpura faufa’a 2024.

Mai te mea te fā, ’o te ha’amara’ara’a i te nūmera o te mau manihini i Pōrīnetia farāni, eita roa e roa’a i te mau hōtera ’utuāfare, ana’e, i te tāta’i toru i te faito fa’ari’ira’a e vai nei. E vai noa īa te mau hōtera rarahi ei vāhi nohora’a nō te mau manihini ’ona.

Teie nei, tē vai ra teie mau ’ōpuara’a tute i ni’a i te fenua fatuhia, ’o tē fa’ateiaha fa’ahou atu i teie mau hotēra, ’e te fa’aitira’a o te ha’amāmāra’a tute, ’o tē riro i te fa’aātea i te mau ’ona i te Fenua nei, i te taime mau a hina’arohia ai te mau ’ōpuara’a patu rarahi. Tē uiui ato’a nei te ’Āpo’ora’a Mātutu Tī’a Rau e tei hea atura teie ’ōpuara’a “Village tahitien”.

’Ei fa’ahopera’a, tē ha’amana’o ra te Fa’anahora’a ha’amahie i te Fa’ari’ira’a Manihini i Pōrīnetia farāni 2022-2027 i te faufa’a o te fa’ari’ira’a manihini a te nuna’a tā’ato’a ’e nō te tauroa. Teie rā, ia rahi atu ā te tai’o o te mau manihini, e roa’a anei i te nuna’a i te fa’ari’i i te reira, e roa’a anei i te tī’a’au i te mau pehu e fa’aru’ehia.

A ta’a noa atu ā te mau mana’o tu’u e te mau mana’o ’āvei i ni’a nei, tē tu’u nei te ’Āpo’ora’a Mātutu Ti’a Rau ē Mata U’i i te mana’o fa’ari’i i te ’ōpuara’a ture fenua i ni’a i te tauira’a i te ture fenua n°2023-30 nō te 29 nō ’ātete 2023 e ha’apāpū ra i te fa’aterera’a e te tuhara’a mana fa’atere i te poritita fa’ari’ira’a manihini i Pōrīnetia farāni.