Tē ha’amana’o nei te ’Āpo’ora’a Mātutu Ti’a Rau e au te mau ’ōpuara’a fa’aotira’a e te mau ’ōpuara’a ture fenua ia fa’atae ’aruruhia, nō te fa’a’ōhie i te tuatāpapara’a ’e te mātutura’a mana’o.

Nō te mea tē pai’uma marū noa atu ra te nūmera o te mau pere’o’o uira tāuira, fatuhia e te ta’ata tāta’i tahi, te mau tōtaiete, e aore ra te mau taiete uta ta’ata, e ti’a ia fa’aineinehia te mau pou fa’a’īra’a uira pere’o’o tāuira nō te tā’ato’ara’a o te feiā fa’ahoro i teie huru faura’o.

E mea tano rā teie mau huru pou uira, ’o tē riro i te fa’ahuru’ē i te ’ōperera’a uira, ia ’āua-maite-hia.

Te fifi rahi i fa’ahitihia e te mau manihini, ’o te ta’a-’ore-ra’a ïa o te pai’umara’a ti’a o te rahira’a pere’o’o tāuira nō nā matahiti i mua nei, e tae atu i te huru fa’a’īra’a uira a te feiā fa’ahoro i teie huru pere’o’o.

Teie rā, nō te mau fa’ahepora’a e vai ra i ni’a i teie huru pere’o’o, ’e nō te fa’a’ana’anatae i te ta’ata i teie huru ito, ma te fa’atura i te arutaimareva, mea tano roa ia fa’a’āfaro maita’i teie ’ohipa i tōna ha’amatara’a ra. 

Tē hina’aro nei teie ’ōpuara’a ture fenua e ha’amau i te tahi fa’aturera’a i ni’a i te ha’amaura’a e te ha’afaufa’ara’a i te mau pou fa’a’ī uira i roto i te mau pere’o’o tāuira, ma te vaiiho i te mau fatu taiete i te ti’amāra’a i te fa’ahotu i teie faufa’a.

Teie rā, tē uiui nei te ’Āpo’ora’a Mātutu Ti’a Rau i te faufa’a nō te ha’amau, i teiera’a ra, i teie huru fa’aturera’a, i te mea ho’i aita e fa’ata’ara’a i ni’a i te huru o te terera’a o teie nei ’ohipa i te roara’a o te tau, e te pāpū ’ore e vai noa anei te ha’amāmāra’a tute.

Tē ha’amana’o ato’a nei te ’Āpo’ora’a Mātutu Ti’a Rau e tē fa’ari’i nei o ia i te fa’anahora’a e hi’opo’a maita’i atu ā i te faito o te ’āpī a te mau ’ona pere’o’o, i reira e ’itehia ai ua ho’ona anei te arutaimareva e te mau ’aimāmau i te ha’amāmāra’a tute tā rātou i fāna’o.

Tē ha’amana’o ato’a nei te ’Āpo’ora’a Mātutu Ti’a Rau i teie mau mana’o ’āvei :

• E fa’a’ana’anatae i te ta’ata ia fa’a’ohipa i te mau ito mou’ore i te hope’a hepetoma mai te tāuirara’a pereo’o ;

• E nūmera mai i te hō’ē tārifa uira maita’i nō te ho’o i te hope’a hepetoma ;

• E ha’amau i te ha’amāmāra’a tute nō te hāmanira’a i te mau pou ’ōperera’a uira i roto i te mau nohora’a ’āmui, te mau tōtaiete, te mau pū ’ohipa a te hau, ē tae atu i te tauira’a i te fa’aturera’a o te patura’a fare nō te fa’ahepo i teie pou ’ōpere uira i roto i te mau nohora’a fare tahua, ma te fa’a’ohie i te fa’a’ohipara’a o te ito mou’ore ;

• E papa’i i roto i te ture fenua te mau tātarara’a i fa’ata’ahia i roto i te fa’aotira’a ture fa’a’ohipa ;

• E pāpa’i i te Nino’a arata’i i te Ha’amaura’a Pou ’ōpere uira nō te Pere’o’o tāuira, ma te ’ohipa ’āmui e te mau ’oire, nō te fa’aō i te reira i roto i te mau fa’anahora’a fenua a te mau ’oire. ’E ia pāpa’i, i te ’oi’oira’a, te ’īrava ture i fa’ahitihia i te ’īrava LP4, nō te fa’a’ohie i te fa’anahora’a a te mau fatu taiete i te mau vāhi i mana’ohia, ’e tae atu i te mau vāhi e’ere i te mea ho’ona nō rātou ;

• E ha’apāpū i teienei te fa’anahora’a o te pou uira, eiaha ia faufa’a ’ore te mau ha’amāu’ara’a, teiaha vetahi taime, nā roto i te ho’ora’a mai i te mau māteria, tū’ati ’ore i te mau fa’aturera’a a te mau tōtaiete hāmani pere’o’o tāuira ; 

• E mito i te parau ha’amana tōro’a tāmau pou tāuira pere’o’o, ia au i te mau fa’aturera’a o te tāuirara’a, tō te tāmaura’a ’e tō te pārurura’a.

Tei roto teie fa’anahora’a tāmaura’a ’e fa’arahira’a i te mau pou tāuira pere’o’o i te mau fā rarahi o te Tārena tauira’a ito, ’e teie te huru fa’a’ohipara’a i fafauhia na e te mau fa’aterera’a hau fenua e rave rau.

E mana’o fa’aitoito tō te ’Āpo’ora’a Mātutu Ti’a Rau i te mau poritita ato’a a te Hau fenua e fa’atano i te ha’amahiera’a o te fa’atupura’a faufa’a ’e te maita’i totiare i te mau perera’a hōhonu nō te pāruru i te arutaimareva e te tauira’a o te ito.

Tera rā, nō te pāpū ’ore o te fa’anahora’a o te tute e fa’a’ohipa i ni’a i teie tuha’a ’ohipa, ’e te faufa’a ’ore o te ture, ua tu’u te ’Āpo’ora’a Mātutu Ti’a Rau ē Mata U’i nō Pōrīnetia farāni i te mana’o aita e fa’ari’i i te ’ōpuara’a ture fenua i ni’a i te fa’arahira’a i te mau pou uira fa’a’ī pere’o’o tāuira, mai tei pāpa’ihia.