Teie te tumu parau o te ’ōpuara’a ture, i tu’uhia i roto i te ’Āpo’ora’a Mātutu Ti’a Rau ē Mata U’i, nō te mono i te ture fenua n°2023-5 nō te 5 nō tēnuare 2023 fa’a’orehia : 

• Fa’aturera’a i te vetahi mau ’ōhipa e ravehia e te pakaroro ’aita e hu’a ta’ero ;

• Fa’anahora’a i te tanura’a o te pakaroro aita e hu’a ta’ero, te poro’ira’a i te mau huero ē tae atu i tō rātou tapiho’ora’a ;

• Fa’ari’ira’a i te mau rā’au hu’a pakaroro

Teie nei, nō te mau fa’anahora’a i ni’a i te mau ’ohipa ha’afaufa’a i te pakaroro ’aita e hu’a ta’ero, mai te CBD te huru, tē mana’o nei te ’Āpo’ora’a Mātutu Ti’a Rau ē Mata U’i e ti’a roa te mau hotu, e mā’a tāCBD anei, e mono’i tāCBD anei, e rau’ere tī tāCBD anei, etv, eiaha rātou ia ’ōpanihia, mai te rā’au ta’ero ra, noa atu te raura’a o tō rātou fa’aineinera’a. 

Nō reira, tē fa’ariro nei te Fare Rau Maire :

• Ia hi’ohia te fifi i te pae nō te ’ea o te huira’atira, mea fa’ahepohia teie mau hotu ia auraro i te vetahi mau tītaura’a, hau atu ā ia ’āmuhia ’e aore ra ia inuhia e te ta’ata ;

• Tē tītau nei ’oia i te Hau fenua ia ’āpe’e ’e ia hi’opo’a e tē fa’aturahia ra anei teie mau fa’aturera’a nō te arai i te fa’a’ohipa tano-’ore-ra’a i te mau hotu tāCBD i te pae o te «tāmarū tino » ;

• Tē parau nei ’oia ē, nō te huru o te ravera’a a tō tātou ahureva i ni’a i te pūai o te hu’a ta’ero THC o te pakaroro, aita roa e ha’apāpūra’a e fa’aturahia ra anei te faito rahi e 0,3% o te hu’a THC ;

• Tē ha’amana’o nei ’oia e tauiui ato’a te huru o te CBD, nō reira mea tano roa ia ha’apa’o-maita’i-hia te mau tāpa’opa’ora’a, te fāito rā’au e rave i te mahana hō’ē, ’e ia hi’opo’ahia te maita’i o te hotu.

Nō te parau o te tanura’a i te pakaroro aita e hu’a ta’ero, tē fa’ari’i nei te ’Āpo’ora’a Mātutu Ti’a Rau ē Mata U’i ia ha’amauhia te tahi ’āma’a ’ohipa pāpū nō te pakaroro, ia vai mai te rēni nu’ura’a o te paka, ’e ia ’itehia te faito maita’i o te hotu o te fenua nei.

Teie ra, ia hi’ohia te huru o teie ’ōhipa i teie mahana, tē uiui nei te mana’o i ni’a i te fa’aturera’a o te fa’a’apu pakaroro, e riro paha i te pātore, ’e tē hina’aro nei ’oia ia ha’apāpūhia te mau rave’a arai, i te pae o te ’āpe’era’a ’e te hi’opo’ara’a tu’utu’u ’ore, mā te mito ia rava’i te feiā ’ohipa ’e te mau rave’a ato’a.

’Ei fa’ahopera’a, nō te fa’anahora’a ture o te mau rā’au hu’a pakaroro, tē fa’aara fa’ahou nei te ’Āpo’ora’a Mātutu Ti’a Rau ē Mata U’i ’e ia rave-rū-hia te mau fa’anahora’a e fa’ature, e ’āuaha’ati, ’e e pāruru i te pakaroro rapa’au ma’i, ’ei pāhonora’a i te mau anira’a e tīa’ihia ra e te feiā ma’i i ro’ohia i te mau ma’i i fa’ahitihia i ni’a nei. A tae ra, te ’Āpo’ora’a Mātutu Ti’a Rau ē Mata U’i

• Teie e maere nei i te ’orera’a te mau tai’o, e ’ite-pāpū-hia ai te huru o te hina’aro mau i Pōrīnetia farāni ;

• Teie e ani nei ia hapāpūhia te ’oti’a o te pakaroro rā’au rapa’au, nō te fa’ata’a te « pakaroro rapa’au » i te « pakaroro tamarū tino » e te « pakaroro fa’a’ārearea » ;

• Teie e parau nei ’e ia fa’a’ohipahia te pakaroro ’ei rā’au rapa’au, e au te feiā ma’i ia aupuruhia, mā te ’āpe’e ia rātou, mā te ha’api’i i te tā’ato’ara’a o te feiā utuutu ma’i, ’e ia ha’apāpūhia e fa’aho’ihia te ha’amāu’ara’a o teie mau rā’au.

Ia au i te mau mana’o tu’u e te mau mana’o ’āvei i ni’a nei, teie te mana’o o te ’Āpo’ora’a Mātutu Ti’a Rau ē Mata U’i :

• Aita ’oia e fa’ari’i nei i te mau fa’anahora’a e fa’ature ra i te vetahi mau ’ohipa i ni’a i te fa’a’ohipara’a i te pakaroro aita e hu’a ta’ero (pene II o te ’ōpuara’a ture fenua) ’e te tanura’a o te pakaroro aita e hu’a ta’ero (pene III o te ’ōpuara’a ture fenua), mai tei pāpa’ihia ;

• Tē fa’ari’i nei oia i te mau fa’anahora’a e fa’ata’a ra i te pakaroro rapa’au ma’i e roa’a ai i te poro’i i te rā’au pakaroro, ’e i te taime au, i te hāmani roa i te fenua nei, ’e ha’amana roa i taua mau rā’au ra (pene IV o te ’ōpuara’a ture fenua).

Teie te mana’o o te ’Āpo’ora’a Mātutu Ti’a Rau ē Mata U’i i ni’a i te ’ōpuara’a ture fenua e fa’ature i te vetahi mau ’ohipa e ravehia e te pakaroro aita e hu’a ta’ero, ’e te mau rā’au rapa’au e vai ra te hu’a pakaroro.