Te horora’a i mua i te ture nō te fa’ahau i te mau pe’ape’a e tupu ra i rotopū i te ta’ata, e fatu pātana, e ho’o tao’a, e ti’a fa’atere tōtaiete, e fa’aotira’a fifi ia rave, teie noa ra rā ho’i te rāve’a e matara ai te fifi, i te pinepinera’a.

Mea tano roa ia fa’a’ohiehia te horora’a i mua i te ture nō te tā’ato’ara’a. Vetahi taime, e fāna’o ato’a rātou i te tauturu a te tahi pāruru i roto i tā rātou horora’a, e tauturu i te pae o te fa’aturara’a i te fa’anahora’a eiaha tā rātou horora’a ia pāto’ihia mai nō te ‘orera’a e fa’atura i te fa’anahora’a ture.

Nō reira, ma te ’ore e ha’afifi i te mana o te ta’ata ia ti’a tino roa atu i mua i te tiripuna horora’a matamua, ’aore ra te tiripuna ho’o tao’a, tē ha’amana nei teie ’ōpuara’a ture ia rave i te tahi pāruru mai te peu ua ’aifaito, e aore ra ua hau atu i te 1 200 000 farāne te tino moni o te ’aimarōra’a, eiaha fa’ahou ra te faito moni e 2 000 000 farāne i teie mahana.

Tē pe’ape’a nei te ’Āpo’ora’a Mātutu Ti’a Rau i ’ore ho’i te feia pāpa’i i te ’ōpuara’a ture i tu’u mai i te mau tumu o te nu’ura’a i mua, e aita ato’a ho’i i fa’ata’a mai i te nātura e te ’ā’anora’a o te mau hotu maita’i o tāna e fa’atupu.

Tē ite nei oia, ia au i te mau tai’o a te mau piha ’ōhipa a te mau tiripuna, mea iti roa te nūmera o te mau ha’avāra’a e tupu nei ’aita e pāruru (te faito e 5%).

Tē mana’o nei te ’Āpo’ora’a Mātutu Ti’a Rau e riro teie mau tauira’a ture i te fa’autu’a i te feiā ri’iri’i i te fa’ahepora’a ia rātou ia ’aufau rahi atu ā, noa atu e tē vai ra te tauturu a te ’āfata veve.

Tē ha’amana’o nei te ’Āpo’ora’a Mātutu Ti’a Rau, a tahi, nō te fāna’o i te ’āfata veve tē vai ra te mau tītaura’a pāpū maita’i, ’o tē tano roa ia tuatāpapa-fa’ahou-hia a fa’atano atu ai i te mau tauiuira’a, ’e a piti, ’aita ato’a i pāpū roa e mara’a mau ra anei te faito o te pu’e horora’a e tuatāpapahia.

Nō te reira mau tumu, teie tōna mau mana’o ’āvei :

• Ia fa’anane’a mai ā te feiā papa’i ture i te mau mana’o i ni’a i te mau tauira’a o te ’ōti’a moni ’aimarōra’a i ha’amauhia, ’e ia tātara mai i te huru ’e te ’ā’anora’a o te mau hotu e roa’a mai i te mau pae ato’a, hau atu ā i mua i te parau o te fāna’ora’a i te tauturu ’āfata veve.

• Ia ha’afātata atu te Hau fenua i te Hau hui ia fa’a’ohiehia mai te fa’anahora’a o te ha’afāna’ora’a i te tauturu ’āfata veve. ’E ia pāpū iāna ua rava’i mau te faufa’a a te piha ’ohipa ha’apa’o i taua tāpura ’ohipa ra, ’e a fa’arava’i noa ato’a atu ai i te mau fa’anahora’a fa’aara i te feiā ri’iri’i ;

• E ti’a i te Hau fenua ia ha’amau i te tahi tauārai ture e te tahi tōmite tauārai ture, mai te tōmite ārai fenua tei fa’ati’ahia na ē a tae mai te matahiti 2017.

Nō reira, ua tu’u te ’Āpo’ora’a Mātutu Ti’a Rau ē Mata U’i i te mana’o aita e fa’ari’i i te ’ōpuara’a ture i ni’a i te tauira’a o te fa’aotira’a n°2001-200 APF nō te 4 nō tītema 2001 tauihia i ni’a i te papa ture tīvira o Pōrīnetia farāni.