Parau poto a te 'Āpo'ora'a Mātutu, Ti'arau E Matau'i a Pōrīnetia farāni (CESEC).

Te maha o te Pū manafa'atere a Pōrīnetia farāni, e riro te 'Āpo'ora'a Mātutu, Ti'arau 'e te Matau'i a Pōrīnetia farāni 'ei fa'ahopera'a i te orara'a mana fa'atere a te Fenua.

E 'Āpo'ora'a hōmana'o

E riro te Pū manafa'atere, nā roto i te mau hōmana'o ferurihia 'e te mau fa'auera'a tano, i tē amo i te hō'ē ti'ara'a a'o i pīha'i iho i te mau manafa'atere a te Hau, mana fa'a'ohipa 'e aore rā mana 'īriti ture, e tauturu nei ia rātou 'ia rave i tā rātou mau fa'aotira'a.

 

E nehenehe tā te Fa'aterera'a Haufenua, te 'Āpo'ora'a rahi nō Pōrinetia farāni e ani i te mana'o a te CESEC nā roto i te hō'ē tītaura'a 'e, e nehenehe ato'a tā na e hōro'a i tō na mana'o i ni'a i te mau tumu parau tā na i mā'iti (ihotītaura'a).

 

'Ua 'ōpua te Ture manafa'atere n° 2004-192 nō te 27 nō fepuare 2004 e tītau-fa'ahepo-hia te CESEC nō te mau 'ōpuara'a 'e aore rā "ture fenua" ato'a nō te parau 'imira'a faufa'a 'e aore rā tōtiare, o tei fa'arahi i te 'ohipa a te pū manafa'atere 'e o tē hōro'a i te hō'ē ti'ara'a rahi i roto i te fa'anahora'a fa'aotira'a a te Haufenua, noa atu aita tō na hōmana'o e hono i te mau mana fa'atere i tītau ia na.

 

Te taime e hōro'ahia nā na nō te hōro'a i tō na mana'o e hō'ē 'āva'e, fa'aho'ihia i ni'a i te fāito e 'ahuru ma pae mahana mai te peu 'ua 'itehia te rū nā te fa'aterera'a haufenua 'e aore rā nā te 'āpo'ora'a rahi. 'Ia hope taua taime rā, 'ua fa'aotihia 'e 'ua hōro'ahia te mana'o.

AP
Te ti'ara'a o te CESEC i roto i te fa'anahora'a 'īriti ture

E mana tō te mau Ture Fenua i ni'a i te orara'a o te mau Mā'ohi. Nō te reira, mea faufa'a rahi 'ia hōro'a te mau ti'a a te tōtaiete tīvira i te hō'ē mana'o.

 

'Ia ta'a maita'i te ti'ara'a o te CESEC i roto i te fa'anahora'a 'īriti ture, teie te terera'a a te hō'ē 'ōpuara'a ture fenua :

parcours lp vtah
I roto i te pū mau o te tumu parau

Te tītaura'a :

 

I roto i te fa'anahora'a o te mā'itira'a i te hō'ē ture fenua nō te parau o te 'imira'a faufa'a 'e aore rā tōtiare, e tītau te Peretiteni nō Pōrīnetia farāni 'e aore rā te Peretiteni nō te 'āpo'ora'a rahi, i te CESEC 'ia hōro'a o ia i tō na mana'o i ni'a i taua ture fenua rā, e 'ōpuahia nei.

 

E hōro'a te piha fa'atere rahi a te CESEC i te tītaura'a i te tōmite mana o tē tuatāpapa i te 'ōpuara'a o te ture fenua 'e, e tāpura o ia i tā na mau hi'opo'ara'a 'e tā na mau fa'auera'a o tei riro 'ei 'ōpuara'a hōmana'o o tei tu'uhia i te mā'itira'a a te 'āpo'ora'a mero hope a te CESEC.

 

'Ia mā'itihia taua 'ōpuara'a hōmana'o rā nā te 'āpo'ora'a mero hope, e fa'ataehia atu o ia i te mau mana fa'atere a te Haufenua 'e, e piahia nā te nūna'a.

 

 

Te ihotītaura'a :

 

E nehenehe tā te CESEC e tuatāpapa i te mau uira'a e mana tō na.

 

Nō te reira, e mā'iti-nāmua-hia te ihotītaura'a 'e te pae rahi o te mau mero e vai nei i roto i te patu 'e aore rā te tōmite e ani i te tuatāpapara'a. I muri mai, e fa'ataehia atu o ia i te Peretiteni a te CESEC rā o tei tāpa'o atu i te tāpura rurura'a i mua atu a te piha fa'etere rahi nō te hi'opo'ara'a hou a fa'ataehia atu i te 'āpo'ora'a mero hope nō te mā'itira'a.

 

'Ia mā'iti te 'āpo'ora'a mero hope a te CESEC i te pae rahi o nā piti i ni'a i te toru o tō na mau mero i te anira'a ihotītaura'a, e ruru fa'ahou te piha fa'atere rahi nō tē hōro'a i te tuatāpapara'a o taua ihotītaura'a rā i te hō'ē tōmite.

 

E rave te tōmite i te mau 'ohipa tuatāpapara'a i te ihotītaura'a o tē tāpae atu i te pāpa'ira'a i te hō'ē 'ōpuara'a parau tuatāpapa o tē tu'uhia i mua i te 'āpo'ora'a mero hope nō te mā'itira'a.

 

E fa'ataehia taua parau tuatāpapa rā i mā'itihia 'e te 'āpo'ora'a mero hope i te mau manafa'atere o te Haufenua 'e, e piahia nā te nūna'a.

Te hō'ē pū manafa'atere e tā'ati nei i te tā'ato'ara'a o te mau 'āvirira'a itoito o te Haufenua

E tai'o te CESEC e 51 mero i mā'itihia nō te roara'a e 4 matahiti. E ti'a rātou o te mau pupu tōro'a, aupupu pāruru rave 'ohipa, te mau fa'anahora'a 'e te mau tā'atira'a e ha'a nei nō te orara'a 'imira'a faufa'a, tōtiare, arutaimāreva 'e ta'ere nō Pōrīnetia farāni.

 

Vāhi ferurira'a 'āmui, mā'imira'a fa'aaura'a 'āmui, e vāhi teie i reira te mau ti'a o te 'āvirira'a itoito o tō tātou fenua e fārerei ti'amā 'e 'aifāito ai.